Í fótspor Meistarans - hlutverk kirkjunnar

Í fótspor Meistarans - hlutverk kirkjunnar

Uppbygging guðspjallsins er markviss og í inngangi að því í 3 og 4 kafla koma fram grunnþættir himnaríkis: helgihald, vitnisburður, boðun, samfélag og kærleiksþjónusta. Starfar söfnuðurinn og þjóðkirkjan í samræmi við markmiðin sem Meistarinn setur?

Hver er lærisveinn og hver er kennari?

Áður en lengra er haldið er rétt að skoða afstöðuna milli kennara og lærlinga. Eflaust er það erfiðasta lexía lærisveinanna. Sá sem vill leiðbeina á að vera eins og barn. Þegar lærisveinarnir spurðu Jesú: "Hver er mestur í himnaríki?" þá kenndi Jesús þeim eftirfarandi:

"Hann kallaði til sín lítið barn, setti það meðal þeirra og sagði: "Sannlega segi ég yður: Nema þér snúið við og verðið eins og börn, komist þér aldrei í himnaríki. Hver sem auðmýkir sjálfan sig eins og barn þetta sá er mestur í himnaríki. Hver sem tekur við slíku barni í mínu nafni, tekur við mér" (Mt. 18:1-5).

Þetta á að vera afstaða kennarans til nemans. Kennarinn á að verða sem einn af nemunum. Það er aðeins einn kennari og einn meistari, það er Kristur. Þeir sem líta stórt á sig eru ófærir um að leiða aðra til Krists. Orð Jesú standa gegn þeim: "Hver sem upphefur sjálfan sig, mun auðmýktur verða, en sá sem auðmýkir sjálfan sig, mun upphafinn verða" (Mt. 23:8-12). Jesús notar orðið "smælingjar" (á grísku: ho mikron ) á lærdómsríkan hátt um börnin, eða hvað? Líklega er hann að tala um lærisveinana sína í sömu andránni. Hann vildi kenna lærisveinum sínum þá afstöðu sem hann hafði sjálfur. Sá sem vill gæta "smælingjanna" verður að auðmýkja sjálfan sig, verða einn af þeim, eins og Jesús varð einn af okkur (Mt. 18:1-14). Það er eftirfylgdin.

Í leit okkar að þessum grunnþáttum hjá Matteusi virðist gagnlegt að spyrja sig fimm spurninga. Matteus talar um fimm þætti eftirfylgdarinnar. Allir eru þeir nauðsynlegir, engan má vanta og engan má ofgera, því að þeir mynda eina heild. Rétt sköpuð hönd er með fimm fingur, einn þumalfingur og fjóra aðra. Eins er með fimm þætti eftirfylgdarinnar, þar er ein þumalfingursregla og fjórar aðrar. Þetta dásamlega sköpunarverk vinnur best ef allir fingurnir eru samhæfðir með þrotlausri æfingu frá barnæsku til fullorðinsára. Eins er því farið með eftirfylgdina. Spurningarnar eru þessar:

1. Hvernig tilbiðja "smælingjarnir" Guð?

2. Hvernig þjóna þeir Guði sem lærisveinar og vitnisburður hans í heiminum?

3. Hvernig prédika og kenna lærisveinarnir fagnaðarerindið í heiminum?

4. Hvernig lifa þeir saman sem lærisveinar?

5. Hvernig þjóna þeir í heiminum eins og Jesús gerði?